![](https://extranewss.com/wp-content/uploads/2023/09/صورة-واتساب-بتاريخ-2023-09-19-في-14.38.01.jpg)
عاوز تشترى عربية مستعملة وميضحكش عليك 👇👇👇👇👇👇👇👇👇
90% مننا بيشترى عربيات مستعمله
و90% من اللى بيشتروا عربيات مستعمله معندهمش الخبره الكافيه للشراء
عشان كده مش بيبقى قدامهم غير 3 حلول
1 يا بيشترى بخبرته البسيطه وبحظه ( وغالبا بيوقع فريسه للتجار يقطعوا رقبته ( الا من رحم ربى ))
2 يا بيشترى من حد معرفه جار او صديق او قريب وبرضه هو وحظه ( ممكن برضه يلبس فى الحيط )
3 يا بياخد حد خبره معاه يفرزله العربيه ( وبرضه ممكن يبيعه ويعمل مصلحه عليه )
طريقك مسدود مسدود يا ولدى
فطبعا الناس بتهرب من كل ما سبق وتروح تشترى زيرو ولو حتى قسط ( وهنا بيقعوا فريسه للبنوك وشركات التأمين تتسلى عليهم )
طب والحل
(( الحل السحرى دائما وابدا انك تعتمد على نفسك ))
طب ازاى ؟
والخبره نجيبها منين ؟؟
انا اقولك ازاى
هديك خلاصة خبرتى
فى مجموعة نقاط لو مشيت عليها بأذن الله هتشترى احسن عربيه
ومش هيتضحك عليك ابدا بأذن الله
بعد المقدمه الطويله دى هنبدأ موضوعنا
بسم الله
اولا وقبل اى شيئ لازم تكون محدد لنفسك هتشترى ايه قبل ما تنزل تدور او تشترى
بمعنى
عايز عربيه عائليه
ولا عربيه شبابيه
عربية سفر
ولا جوه المدينه
حدد احتياجاتك اول
ثم
حدد الفئه السعريه
انت معاك كام
وآخرك كام
لو فرضنا آخرك 80
دور على العربيات اللى ب 85
ليه ؟
لأن طبيعة الشعب المصرى انه يزود وانت تفاصل
حدد الفئه السعريه ومتطلباتك من العربيه
بكده هتكون حكمت اختياراتك ما بين 5 موديلات تقريبا
هتحاول تجرب قيادتهم من اى صديق
ليه ؟
عشان متجبيش العربيه وتلاقى نفسك اتصدمت انك مش مستريح فيها ولو بعت هتخصر
فجربها اول
كده اختيارك اتحكم ما بين عربيتين تقريبا
ادخل على النت
وابحث عن مميزاتهم وعيوبهم من ملاكهم مش من سميعه وفتايين
اهم نقطه تخلى بالك منها وانت بتحدد اختياراتك هى
توافر قطع الغيار وفنيين الصيانه للعربيه فى بلدك او قريب منك
حذارى تجيب عربيه مش منتشره فى بلدك
هتتعب تعب السنين
المهم
اختارت وحددت هدفك وهتنزل تشترى خلاص
انزل دور على العربيه ( الحاله الأستثنائيه ) حتى لو زايده 5 آلاف عن سعر سوقها ( طالما مش هتتاجر )
( الحاله الأستثنائيه عباره عن عربيه كيلوتها تحت ال 80 الف و بدون بويه نهائى ورخصه طويله وحاله عامه داخليه وخارجيه ممتازه وموديل لايذيد عن 5 سنين فاتوا ))
العربيات الحاله
غالبا هتبقى مع تجار
متخفش
ادخل عليهم وانت فاهم ومطمن ولازم تكون عارف السعر السوقى للعربيه وحالتها وموديلها
(( ودى هتعرفها من سعر المعروض من نفس الموديل والحاله على مواقع بيع العربيات المستعمله ))
وبرضه هفكرك
ان اللى عارض عربيه غالبا مذود على تمنهت من 3 الى 5 آلاف جنيه لزوم الفصال
فخلى بالك
طيب هتجيب عربيه منين
قدامك كذا اختيار وجربهم كلهم
1 معارفك
2 معارض او تجار حواليك
3 سماسرة سيارات
4 المعروض على النت
وانا قاصد اخلى الشراء من النت آخر اختيار
عارفين ليه ؟؟؟
لكمية الغش وقلة الضمير الرهيبه الموجوده حاليا عند اغلب المعلنين
فلو التجئت للنت فى الشراء
خليك دايما فى الأمان وابحث فى نطاق محافظتك بس
واوعى تسافر
هتزعل جدا
وصلنا للعربيه اللى هنشتريها ( اى كانت الطريقه )
وخلاص بنشترى
هنعمل ايه بقى ؟؟؟
ده لب موضوع الليله
اول حاجه
متشتريش ولا تتفرج على عربيه بالليل ابدا ابدا ابدا .
((( لازم بالنهار )))
قالوا زمان ( النهار له عنين )
وصدقوا
هتوقف قدام العربيه من بعيد
وتلف حواليها
وبنظره فاحصه
هل العربيه واقفه مظبوطه ؟
ولا مايله بجنب او مقلوبه اللى الأمام او الخلف
طيب واقفه مظبوطه ( دكر واقف كده )
تمام .
طيب لون البويه موحد ولا فى باب او رفرف او كبوت افتح او اغمق من الباقى ؟
ركز اوى فى حكاية اللون دى
طيب بص برضه من بعيد
اجناب العربيه وسقفها وكابوتها سلام ولا معرجين ؟
قرب شويه
وبص على فواصل الصاج
اى المسافات ما بين الأبواب وبعضها
الأبواب وجسم العربيه
الكبوت والشنطه
لازم تكون فروقات العربيه مظبوطه فوق زى تحت
ويمين زى شمال
كل اللى فات تمام .
طيب
مشى اطارف ايديك بضهر ايدك ونقر بضهر ضوافرك على صاج العربيه بالكامل وانت بتلف حواليها
الصاج السليم اللى مش راشش ولا شايل معجون صوته رنان
اما الصاج اللى راشش وآخد معجون هتلاقى صوته مكتوم عن الباقى
محسوسه جدا متقلقش ( بس عايزه شوية ممارسه )
طيب كل اللى فات تمام
بص على الكاوتش
تاريخ انتاجه قديم ولا جديد
المداس متاكل ولا جديد
طب لو متاكل شويه
التأكل شبه بعضه ولا جنب وجنب
كل ده بيدلك على حالة العفشه اجمالا
واوعى تشترى عربيه كاوتشها مفلق او كل فرده نوع
دى بتبقى يا مع واحد معفن و ( ابعد عنه )
او مع تاجر معفن برضه
اخد كاوتشها الجديد وجاب طقم كاوتش مستعمل ملموم من عند اى بتاع كاوتش عشان يكسب بزياده وبرضه ( ابعد عنه )
كده احنا خلصنا المعاينه الخارجيه
نبدأ بقى نعاين قلب العربيه
هنفتح الكابوت
وهتبص على صدر العربيه
اللى هو الصدر الصاج اللى فى مقدمة السياره اللى شايل الفوانيس والريداتير
معرج
فيه اثار دق او بويه
مسامير اطرافه باين فيها علامات فك او تركيب ( فى عربيات بيتغير ببعضه بعد اى حادثه )
طيب الفوانيس
هل قواعدها مكسوره ؟
(( اهم حاجه تكشف على صدر العربيه ده كويس اوى لأن اى خبطه فى وشها بتعلم فيه ))
لو تمام يبقى خلاص .
لو قلقت من اى حاجه
نام تحت وش العربيه وبص على الصدر التحتانى وشاسيه الأكصدام
اللى بيصلح او بيخبى مصيبه بيهتم بفوق بس مش هيصلح تحت
من هنا انت تقفشه
هتبص على طرف الكابوت
اللى اسمه الفلتو
هل فيه طقه او رد قبل كده
كمان هتبص على مسامير تثبيت الكابوت بجسم العربيه
عليها علامات بويه
عليها علامات فك وربط
(( فى ناس العربيه تعمل حادثه
وتجيب كابوت على لونها وتركبه وتبقى العربيه شركه ( فخلى بالك ) ))
نفس الفحص اللى عملناه للكابوت وصدر العربيه
هنعمله بالظبط للشنطه والأبواب
وبالنسبه للشنطه هنزيد عليها انك مشكورا تحل الأستبن تخرجه بره وتبص على ارضية الشنطه
فيها عرقصه او اعوجاج فى الصاج
او فيها تخزينة خبطه قديمه
ركز معايا اللى يرضى عليك
المهم ..
هنفتح بقى الصالون
عاين الفرش والتابلوه والكراسى
راجع على كل الكماليات شغاله ولا لأ
واهم مصيبه
التكييف
يشغال كويس
يا تبعد عنها
اللى يقولك عايز يتشحن
قوله اشحنه انت >>>
صيانة التكييف غاليه
فأبعد عن المشاكل
بص على كيلوات العربيه
وطابقها على حالة الطاره ومقبض الفتيس وكاوتش الأبواب والدواسات
لقيت بقى الحاجه دى متأكله والعداد بيقولك 30 الف
يبقى البياع غشاش وابعد عنه لأن ما خفى كان اعظم >>>
لسه باقى ايه يا رجاله نشيك عليه ؟؟؟
لسه الموتور والعفشه وورق العربيه
الموتور
هتدور العربيه بدون ما تدوس بنزين
واسمع صوت الموتور
طبيعى ولا فيه برجله ؟
ناعم ولا خشن ؟؟
شغل التكييف وشوف تأثيره على انتظام الموتور
خلى حد يدوس بنزين وانت بص على عادم السياره
عادى ولا ليه لون
حط ايدك على ديل الشكمان واكتمه
وشوف الشكمان منفث ولا سليم
شم ريحة ايدك
ريحتها بنزين نى او اتعكت هباب مزيت
لو اى مما سبق ابعد عن العربيه
اوقف قدام الموتور
وزود بنزين
اسمع كويس
فى اصوات خربطه من فوق اى تحت ؟
اقعد فى العربيه
والعربيه دايره سلانسيبه
ودوس دبرياج للآخر
واسمع كويس
صوت الموتور اختلف فى صوت شخلله مع او بدون دبرياج
لو فى اصوات ابعد عنها
يبقى بلية الدبرياج او بلية الدرك بايظين
دوس دبرياج
وادى العربيه كل الغيارات وهى واقفه وشوف فى عضه فى الغيارات ولا لأ
شد الهاند
وادى العربيه الغيار الرابع وزود بنزين
وحاول تطلع بيها
لو طفيت
تبقى مجموعة الدبرياج سليمه
لو فضلت دايره يبقى الدبرياج مفوت
الأوتوماتيك
اركب العربيه
وسوق على كل الغيرات
وشوف النقل بيجى ناعم ولا فى نتشه
لو فيها نتشه ابعد عنها
جرب تدوس كيك داون
( تسارع مفاجئ تدوس الدواسه للآخر فجئه وشوف استجابة الفتيس والموتور وصوتهم )
بص على الموتور كويس جدا
وشوف
فى آثار تسييل زيت على اى جزء منه
لو ليه كفر
فكه وبص تحته
هما مسمارين 10 بس
بص على بطن العربيه وشوف فى اى رشح زيت من تحت
متخدش موتور راشح زيت
افتح مية الريداتير والعربيه بارده
وشوف الميه خضراء ورايقه
ولا مصديه
ولا على وشها زيت
لو على وشها زيت (( ابعد عنها ))
طلع مقاس الزيت وبص على حالة الزيت
خفيف
محروق
لو عليه ميه (( ابعد عنها ))
اطلع بقى جرب العربيه عشان تقيم حالة العفشه
اكسر يمين للآخر واطلع بالعربيه بسرعه سنه
وكذلك الشمال
لو فيها طقطقه تبقى فيها ( كبالن بايظه )
امشى بالعربيه بدون ما تشغل الكاسيت
وانزل فى المطبات بسرعه شويه مره بالجنب اليمين ومره بالجنب الشمال
وشوف فى اصوات خربطه ولا لأ؟
وانت واقف ثابت
امسك الطاره
وهزها سنه يمين وسنه شمال
واسمع كويس
فيها طقه ولا لأ ( دى اسكاتره )
انزل قدام الأربع عجلات وامسك الفرده من اطرافها كويس وهزها يمين وشمال فوق وتح
واسمع فيها طقه ولا لأ
فيها بوش ولا لأ
ده ( كشف البلى والمقصات )
خلصنا العفشه
هنبص على ورق العربيه
لازم تبقى الرخصه واضحه وسليمه وساريه
متشتريش رخصه منتهيه
طابق رقم الشاسيه والموتور على الأرقام اللى فى الرخصه
لو قالك مسقط موتور ولسه متسبتش على الرخصه (( ابعد عنها ))
هتعرف مكان رقم الشاسيه والموتور فى العربيه منين
قبل ما تكشف على العربيه اسئل حد من ملاكها على مكانهم من على النت
لو فيها توكيلات
طابق الأسماء والأرقام والأختام كويس جدا قبل ما تشترى
ومتشتريش عربيه بدون برائة زمه
لازم يجيبلك برائة زمه او شهادة مخالفات ( مخالفة عكس السير لوحدها 2000 جنيه )
ولو قالك هجيبهالك كمان يوم او اتنين احجز عليها فلوس لا تقل عن 2000 جنيه واكتب عقد ابتدائى بالتفاصيل دى وكمان بتاريخ تسلم ورق العربيه ( كضمان حقوق )
بكده انت معاك العلم اللى تقدر تنتفع بيه
ومحدش يعرف يضحك عليك يا صاحبى
![](https://extranewss.com/wp-content/uploads/2023/09/صورة-واتساب-بتاريخ-2023-09-19-في-14.38.01.jpg)