![](https://extranewss.com/wp-content/uploads/2023/06/352935882_2402426913260715_5336214778368417989_n.jpg)
رامز رؤوف ينصح الشباب ازاى يلاقوا شغل بسرعة من أكتر الحاجات اللى بتشغل دماغ الشباب هى قصة الشغل ويا ترى هلاقى شغل ازاى ؟ اخد شهادات وكورسات ولا اتدرب فى مكان ولا اعمل ايه عشان الاقى شغل بسهولة
ودة اللى هنناقشه في خطوات بسيطة
لو عايز تشتغل بسرعة محتاج تجاوب على السؤال دة
” ليه اشغلك انت بالرغم ان فيه مئات المتقدمين لنفس الوظيفة ؟ “
ودة اللى عايزك تركز عليه انهاردة ازاى تبقا فعلا مؤهل انك تفوز بالوظيفة رغم مئات المتقدمين
الشركات دايما بتبحث على افضل شخص ينفع يقوم بالمهام المطلوبة وكمان ينفع يتكيف مع بيئة العمل اللى هى المكان والأشخاص والسياسات وغيرها واهم من كل دة انه ما يبقاش مجرد موظف روتينى
ببساطة احنا كعاملين في مجال إدارة الموارد البشرية بنبحث على الشخص اللى نقول عليه الشخص المناسب فى المكان المناسب وللأسف عدد الناس دى قليل ودة اللى بيخلى الشركات ممكن تقعد تدور اكتر شوية عشان تلاقى حتى لو المدة هتطول او هتدفع فلوس اكتر
المهم بقا عشان تكون الشخص المناسب في المكان المناسب محتاج تكتسب الآتى
أولا اهم حاجة واللى بيتوقف عليها نجاحك في المجال المهنى هى المهارات الشخصية
المهارات الشخصية هي ازاى نتعامل مع الناس اللى حوالينا اللى بنسميها مهارة التواصل وازاى تشتغل فى وسط
مجموعة مش زى ما اتعودت انك تشتغل بشكل فردى وبنسميها مهارة العمل الجماعى ولما بتقع فى مشكلة بتتصرف ازاى وايه ردود افعالك وجودة القرارات اللى بتاخدها على اد مستواك الوظيفى واللى بنسميها مهارة حل المشكلات
ومن اهم المهارات هى بتعرف تخطط لشغلك ولا لا هل لما اديك مهمة هتنجزها بنظام ولا بعشوائية وكمان المهارات الإدارية او القيادية لاننا مش بنبص لدلوقتى بس لا كمان بنبص لبعدين هل ممكن توصل لمناصب ولا هيجى وقت ومش هيبقا عندى صف تانى شاطر ومناسب ومن أهم المهارات او السمات الشخصية اللى بندور عليها هى #الإلتزام ودة من اكتر الحاجات اللى بيبقا بيدور عليها ال HR او صاحب العمل والقابلية للتعليم
او المرونة للتعليم باختصار يعنى انك على استعداد تتعلم حاجات جديدة بسرعة وغيرهم من المهارات اللى مش هيعرف يعلمهالك فى الشغل لانها هتاخد وقت
ومجهود وطبعا فلوس فا بيكون عايز حد جاهز طب انت ازاى تبقا جاهز كلمة السر هنا هى التدريب المهنى و التطوع وكمان الأنشطة الطلابية بالنسبة للطلبة دول اكتر حاجات هينموا مهاراتك الشخصية بطريقة عملية مع طبعا القراءة ودورات تنمية المهارات الذاتيةز الحاجة التانية هى ان شخصيتك تكون مناسبة للشغل نفسه ودة مهم جدا جدا لان لو شخصيتك مش مناسبة للشغل دة هيحصل حاجة من اتنين يا اما بعد فترة هتمل وهتضطر تعمل تغيير للشغل
لحاجة تانى او لو كملت يبقا مش هتوصل لمناصب كبيرة بسرعة ودة معناه ان مهم جدا تعرف نوع شخصيتك وسماتها والاهم انك تعرف الشغل المناسب لشخصيتك كمان وهديلك مثل بقوله كتير فى محاضراتى ان لو شخص اجتماعى وبيشتغل محاسب وشغل الحسابات بيحتاج انك تقعد وقت كبير على مكتب ما بين ملفات وارقام وغيره هتلاقى الشخص دة لانه اجتماعى بيبقا كإنك رابطه فى المكتب كل شوية بيبقا عايز يقوم يتكلم مع زمايله مثلا فى مكتب تانى وهكذا لانه طبيعة شخصيته اجتماعية واحسن شغل له انه يشتغل مع الناس مش مع الملفات والانظمة ودة هنبقا نتكلم عنه في مقال تانى
الحاجة التالتة هى اللغة من الحاجات المهمة ان يكون معاك لغات تانية طبعا الانجليزى من اهم اللغات واكترهم طلباً ودة لأسباب كتير من ضمنها ان لو فى 1000 واحد ممكن يفيدوك لو بتعرف عربى بس فى 1000000 واحد ممكن يفيدك لو بتعرف انجليزى وكمان ان اغلب العلوم اصلها انجليزى وان اغلب برضو الشركات بتشترط ان يكون الانجليزى بتاعك كويس
الحاجة الرابعة هى الكمبيوترrودة ما بقاش مجرد حاجة اضافية دة بقا زى القراءة والكتابة كدة حاجة أساسية ولازم تبدأ من دلوقتى فيها مهما كان سنك من اهم البرامج اللى محتاج تتعلمها هى مجموعة الأوفيس “ Word – Excel – Power Point – outlook “ دول تتقنهم زى الكلام بالظبط وفى دورات كتير اونلاين وأوف لاين ومجانية ابحث بس انت الحاجة الخامسة هى ان يكون عندك خبرة طبعا فى المجال اللى هتشتغل فيه طبعا هتقولى انا لسة متخرج اجيبها منين دى ودى من النقط اللى بيقعوا فيها الشباب لو انت خريج يبقا محتاج اما ان تنزل تدريب #Internship حتى لو بدون أجر وتبذل مجهود شوية فى انك تتعرف على ناس بتشتغل الشغل دة متاخد منهم خبرة بأى طريقة حتى لو هتساعدهم من وانت فى البيت برضو بدون مقابل وممكن كمان تطوع فى اى هيئة خيرية
لو انت طالب بقا عندك 3 شهور الصيف فى كل سنة دراسية يعنى خلال ال 4 سنين مجموعهم يساوى سنة انزل اتدرب فى اى مكان برضو ولو من غير فلوس صدقنى اللى هتتعلمه ممكن بعد شوية تتمنى انك تدفع فلوس فيه فا ما تفتكرش انه لو من غير فلوس دة يعنى عيب وعشان ابقى صريح اغلب الشركات بيكون التدريب مدفوع مش رقم كبير بس بيكون فى فلوس فعلا وعندك كنز تانى برضو جوة الجامعة وهو الأنشطة الطلابية اللى كنا بنتكلم عنها فوق ودى برضو هتديك شوية خبرة ما تفوتهاش وانزل واشترك وشارك فى أنشطة وفاعليات وجرب مرة واتنين وتلاتة وعشرة.
كل اللى فوق دة مهم بس مش هيظهر ومش هتعرف تستثمره لو ما عندكش #CV كويس ودة لازم له بوست لوحده وبرضو لازم يبقا عندك بروفايل على المواقع دى www.linkedin.com ودة من اهم مواقع التوظيف فى العالم والتانى www.wuzzuf.net ودة برضو مهم عشان بقا عليه اغلب الشركات فى مصر والوطن العربى بتعلن عليه الوظايف بتاعتها اللى مهم تعرفه عنهم دلوقتى انك لازم تعمل بروفايل عليها وتعمله تحديث باستمرار وتدخل عليه مرة فى الاسبوع على الأقل لان لو مش بتدخل عليه بيبقا ظهورك فى البحث اللى بتعمله الشركات أقل ولو عندك واحد وعايزنى أقيمهولك ابعتلى دلوقتى.
وفى كنز عندك وانت مش بتستثمره هو العلاقات اسرع مصادر الشغل هى العلاقات كام حد من اصدقائك او معارفك بيشتغلوا فى اماكن مختلفة وكل واحد فيهم اكيد عنده فرص ممكن تنفعلك او تنفع حتى اصحابك ولو علاقاتك مش كتيرة يبقا دى برضو نقطة محتاج تشتغل عليها انك توسع دايرة علاقاتك ودة ممكن بكزا طريقة احضر دورات او ندوات اى ايفنت مناسب لمجالك احضره اى لو ما استفادتش غير انك اتعرفت على ناس فا دى استفادة كبيرة ما تستهونش بيها يلا دلوقتى راجع قائمة اصدقاءك على الفيس بوك مثلا او ارقام التليفونات اللى فى قائمة الموبايل وشوف مين بيشتغل فين دلوقتى